Kvam ligg vakkert til ved Hardangerfjorden, ein god times køyring frå Bergen. Kunstskulen vil her få med seg eit solid historisk bakteppe, og plassere seg i eit område med ekstraordinær stor aktivitet innan kunst og kultur i dag. Det vil liggje godt til rette for samspel med dei andre kulturelle føretaka som både er her allereie, og som er undervegs mot realisering. For å nemne nokre: Harding Puls, Hardanger Fartøyvernsenter, Ingebrigt Vik Museum, Kunsthuset Kabuso, Kvam Kulturskule, Kvam Kunstlag, Kinch-Tunet, Fyksesundet Landskapspark, Barselgrad, Hardanger Folkemuseum og Agatunet og realiseringa av Hardinghuset. Sjølv om Kvam skal vere hovudbasen for skulen, ønskjer skulen å ta heile Hardanger i bruk, til dømes ved at det kan finnast prosjektarbeidsplassar for studentane spreidde rundt i regionen. Eit tett samarbeid med Hardangerrådet. Flytt til Hardanger og Hardangerlokk er særskild viktig i realiseringa av skulen. Kombinasjonen av nærleik til natur og nærleik til by er ein stor fordel. Plasseringa vår vil vere med å gjere skulen annleis enn dei andre ni kunstskulane i landet, som alle ligg i byar. Me vil også utvikle eit så særeige studietilbod, at det vil vere meir naturleg å snakke om samarbeid enn konkurranse med desse skulane. Ringverknadene ved ei slik skuleetablering kan bli store for Kvam og Hardanger.  Kunstskulen vil vere med på å setje Kvam og Hardanger tydelegare på kartet, og styrkje det som er eit av området sin viktigaste identitet: Kunst og kultur. Skulen vil bli ein katalysator for andre kunst- og kulturaktivitetar. Kvam vil få ein nyttig tilvekst av unge innbyggjarar, noko som vil bli ein styrke for til dømes kaféliv og eksisterande kulturaktivitetar Som andre skular, vil kunstskulen spele ei rolle som kunde og medspelar i det lokale næringslivet i det heile. Skulen vil kunna dra lærarkrefter til bygdene, kanskje også som faste innbyggjarar. Med Kunstnarar kjem kompetanse og idealisme saman med ein god porsjon handlekraft. Det vil heile regionen nyte godt av. Om Hardanger fortset å utvikle seg i ei sunn retning når det gjeld satsing på kunst og kultur, vil truleg ein del av elevane busetje seg i Hardanger og gjere regionen rikare.